ازاى استعد لـــ Black Friday كمسوق ؟

ازاى استعد لـــ Black Friday كمسوق ؟

الجمعة البيضاء او الجمعة السوداء سميها الاسم اللى يريحك
المهم بقى ان الجمعة دى فاضل عليها حوالى شهرين هى بتكون اخر جمعة فى نوفمبر
واللى مايعرفش الجمعة دى فهى اكبر موسم للمسوقين فى السنة كلها لان بيكون فيها اكبر كم مبيعات على مستوى العالم واكبر عروض بتحصل فى اليوم ده

طب ده لسا فاضل شهرين ياعم كارم لسا بدرى اوى 😡
هو ده اللى مش عايز اسمعه منك ابدا.. لان دى من اكبر الاخطاء اللى ممكن تعملها كمسوق انك متستعدش من قبلها بوقت كافى وعادة انا شخصيا بحضر للعروض دى قبلها بشهرين

👈 فيجى هنا سؤال مهم .. استعد ازاى لعروض الجمعة البيضاء او السوداء ؟

هنا عندك شقين اساسين
🛑 بتسوق لمنتجات او خدمات خاصة بيك او خاصة بعميل عندك
🛑 بتسوق منتجات لشركات عن طريق الافلييت ( التسويق بالعمولة )

❌ الشق الاول : بتسوق لمنتجات او خدمات خاصة بيك او خاصة بعميل عندك

ده معناه انك متحكم بشكل كامل فى كل حاجة خاصة بالمنتجات والخدمات بتاعتك وتقدر تحدد عروضك فيها فى اى وقت مع مرعاه اى ظروف ممكن تحصل خلال الشهرين دول
وهنا هتكون خطواتك للاستعداد كالتالى
هتبداء اعداد خطة تسويقية خلال فترة العروض دى ( والمفروض انك لو شغال صح من اول السنة بتكون حاطتها ضمن خطتك التسويقية السنوية اللى بتعملها)

👈 طب لو مكنتش عامل كدا يبقى هتعمل الاتى

1️⃣ اول حاجة ارجع لنفس فترة العروض السنة اللى فاتت وحلل منافسينك وقتها كانو بيعملوا ايه بالظبط وايه العروض بتاعتهم وقتها ( وده تحليل استرشادى ) و فى الوقت الحالى ابداء حللهم تانى وشوف اتطوروا فى ايه ومن التحليلين دول ابدء استنتج هيفكروا ازاى السنة دى وممكن يعملوا ايه

2️⃣ ابعت رسائل لعملائك الحاليين ونزل بوستات فى صفحاتك فى المنصات الاجتماعية اسألهم ايه العروض اللى نفسهم فيها الفترة اللى جيا ( الخطوة دى من اهم الخطوات اللى تعملها دلوقت )

3️⃣ حدد عروضك اللى هتنزل بيها وهتكون على اى منتجات او خدمات و اسعارها

4️⃣ حدد اهدافك خلال اليوم ده او خلال الايام اللى فيها العروض لو هتعمل العروض على اكتر من يوم ( يعنى مثلا هبيع 1000 قطعة ده هدفك )

5️⃣ حدد شرائح الجمهور اللى هتوجهله العروض دى

6️⃣ حدد المنصات اعلانية اللى هتعلن فيها

7️⃣ حدد ميزانيتك التسويقية خلال فترة العروض

8️⃣ ابداء فى صنع المحتوى من ( مقالات – صور – فيديو ) اللى يتناسب مع كل شريحة من الجمهور وكل منصة من المنصات

9️⃣ ابدء من دلوقت فى تجميع جمهور من الشرائح المستهدف عن طريقEmail List و Facebook Pixel و Google Tag و اى منصة تانية هتستخدمها

🔟 لو معاك ميزانية اشتغل من دلوقت حملات Awareness و ابدا اعمل انتشار لعلامتك التجارية

فى العشر خطوات اللى فاتت دى انت بتحاول تعمل عملية تهئية وتجهيز لشغلك من الناحية التسويقية

👈 اما النقطة التانية الــ Operations فده محتاج منك بردو تجهيز وتهئية اهمها.

1️⃣ التواصل مع الموردين عشان توفر كميات من المنتجات ويفضل يكون عندك اكتر من مورد

2️⃣ حل مشاكل الشحن الحاليه ويفضل توفير بدائل للموضوع فى حالة وجود مشاكل تلجاء للبدائل

3️⃣ توفير عمالة مؤقتة خلال الفترة دى لتجهيز الاوردارات فى اسرع وقت

4️⃣ توفير موظفين فى خدمة العملاء لاستقبال استفسارات العملاء و اسئلتهم من غير ما يكون هناك تاخير

واى شىء تانى يكون محتاج اعداد قبلها بفترة فى الـــ Operations زى توفير مستلزمات التغليف وهكذا

” كل اللى فات ده بالنسبة لو انت صاحب المنتج او بتسوق لعميل عنده منتجات “

❌ الشق الثانى : بتسوق منتجات لشركات عن طريق Affiliate ( التسويق بالعمولة )

فى الحالة دى الموضوع هيكون ابسط شويا وهيعتمد بشكل كبير على خبرتك فى مجال التسويق بالعمولة
هتعمل 8️⃣ خطوات من ال 🔟 اللى فوق هتستثنى منهم بس الاتى

👈 تحديد المنتجات اللى هيكون عليها عروض لانك مش هتعرف المنتجات اللى عليها عروض من الشركة الا قبلها باسبوع تقريبا ولو الشركة بتحضر نفسها بدرى وانت علاقتك حلوة معاهم ممكن تعرفها قبلها بشهر

👈 واكيد طبعا مش هتشتغل حملات Awareness ممكن تستبدلها بحملات Lead لتجميع الايميلات او بيانات العملاء المهتمين

وطبعا هتكون مريح دماغك خالص من موضوع الـــ Operations ده انت مالكش دعوة بيه خالص

👈 الخلاصة 👉

حاول دايما تستعد بدرى لاى حدث مهم لان دى ببتكون فرصة كبيرة لتطوير شغلك و تنط بيه خطوات لقدام و كمان فرصة لتحقيق ربح كويس بساعدك اكتر فى التطوير والتحديث من شغلك ومن نفسك

اسف للاطالة بس حبيت اقول اكبر قدر ممكن من غير تطويل وحبيت اشارك معاكم الموضوع ده ولو اى حد عنده اضافة للموضوع تفيدنا هستناها منكم فى التعليقات عشان نستفيد كلنا

Karem Omran

Digital Marketing Manager | Google Ads Director | SEM | Instructor

اترك تعليقاً