ازاى تكتب محتوى اعلانى (ده اعلان زى الزفت) ؟

ازاى تكتب محتوى اعلانى (ده اعلان زى الزفت) ؟

👈 ده اعلان زى الزفت 👉

ده كان رائى فى اعلان بقراه و الشخص اللى كان معايا سالنى . ليه بس ؟
وكانت الاجابة ببساط ان اعلان مكتوب بشكل عشوائى ماتعرفش اوله من اخره ولا تعرف عايز يقولك ايه
ودى من اهم واكبر المشاكل اللى ممكن تقابلها فى حملاتك الاعلانية
ممكن بمنتهى البساطة تكون عامل كل حاجة فى حملتك الاعلانية زى الكتاب ما بيقول واستهداف ممتاز وخطة تسويقية ما تخرش المية بس النتائج ضايعة وده كله بسبب ان محتوى الاعلان مكتوب بشكل غلط

👈 تعالى بقى نشوف اهم الحاجات اللى لازم نراعيها واحنا بنكتب الاعلان👇

1️⃣ عنوان الاعلان

ودى اول حاجة واهم حاجة فى الاعلان . واول جملة فى الاعلان بتاعك ولازم تكون بتجذب الانتباه جدا وتكون فى نفس الوقت ليها صلة مباشرة جدا بباقى محتوى الاعلان
لان لو ماجذبتش اللى بيشوف الاعلان بحاجة تلفت انتباهه مش هيقرا الاعلان ولا هيشوفه اصلا
👈👈 مثال على كدا عنوان المقال ده ( ده اعلان زى الزفت ) لفت انتباهك لاحتمالات كتير منها ان دار فى دماغك اكتر من حاجة ممكن يكون بيتكلم عنها المقال ده واكتر حاجة ممكن تكون جت فى دماغك اني بحلل اعلان بعينه 👈 وبقى عندك حب الفضول انك تعرف ايه الاعلان اللى زى الزفت ده وتعرف مشاكله عشان تتجنبها وانت بتعمل اعلاناتك او من باب تعرف رائى انا وخلاص فيه
👈👈لو ده اللى جه فى دماغك ابقى قولى فى التعليقات او قولى ايه اللى جه فى دماغك اول ما قريت العنوان 😉

2️⃣ محتوى الاعلان

لازم يكون محتوى الاعلان بلغة سهلة وبسيطة بمعنى ( لسان حال الناس ) يعنى توصل المعلومة للعميل بوضوح تام ميحسش انه تاه فى الاعلان او انه مافهمش منه انت عايز توصله ايه 💪.. وابعد تماما عن اى رغى فاضى مالوش لازمة باختصار كدا ( اكتب المختصر المفيد اللى يوصل المعلومة بالظبط وفى نفس الوقت بلغة الناس

3️⃣ كلم مشاعر العميل

من اهم النقط جدا فى كتابة الاعلان . الناس اكتر حاجة بتاثر فيهم وتخليهم يخدوا قرارات هى مشاعرهم فلما تكتب اعلان دايما كلم مشاعرهم ركز على كلمات وجمل تربط مشاعر العميل بالمنتج بتاعك . دى من اكتر الحاجات اللى هتخلى العميل يتعلق بمنتجك وعلامتك التجارية 

4️⃣ كلم خيال العميل

عملاء الاون لاين بيقلقوا يشتروا لو المننتج اون لاين بس ومافيش مكان يروح يشوف المنتج فيه . فدايما جسد المنتج بتاعك فى خياله خليه يشوفه كانه قدامه . وانت بتكتب اعلانك تخيل العميل قدامك وبتكلمه عن المنتج وهو ماسكه فى ايده
ده هيخليك ترسم صورة مجسمة عن المنتج للعميل وهو بيقرا
فاكر لما بيتحكيلك موضوع وتقعد تتخيل الصورة قدامك . ده كان بيحصلك لان اللى بيحكيلك قدر يخليك توصل للمرحلة دى
ودى شطارتك بقى وانت بتكتب الاعلان 😉

5️⃣ استخدم محتوى القصص

مهم جدا انك من وقت للتانى تستخدم فى محتوى اعلانك المحتوى القصصى لان علميا الناس بتفتكر القصص والحكايات وبيتعلقوا بيه اكتر بكتير من المحتوى العادى
فدايما استخدم الاسلوب ده واتكلم بقصص عن منتجك زى مثلا
ازاى منتجك غير حياة شخص واتحسنت واتطورت وحل مشاكله اللى كان بيعانى منها 💪

6️⃣ كلم عميلك المستهدف

يعنى خلى محتوى الاعلان موجه للعميل اللى انت مستهدفه مش يكون محتوى عام لكل الناس لاء يكون للعميل اللى انت عارف انه مهتم بالمنتج بتاعك
يعنى مثلا لو مستهدف سن 21 ل 25 يبقى محتوى الاعلان مختلف تماما لو مستهدف ناس من سن 40 الى 50
ولو عندك اكتر مش شريحة مستهدفه يبقى كل شريحة يتعملها اعلان بيخاطبها هى . مش اعلان واحد للكل 💪

7️⃣ اتكلم عن مميزات منتجك

لازم وحتما ولابد ان محتوى اعلانك يكون فيها كل مميزات منتجك وايه اللى هيقدمه للعميل لما العميل هيشتريه . و ايه المشاكل اللى المنتج ده هيحلها للعميل لو اشتراه 💪

8️⃣ خلى العميل يثق فى منتجك

خلى محتوى اعلانك فيه ادلة تثبت صحة كلامك عنه . زى مثلا اراء بعض العملاء فيه . ده هيخلى العميل يثق اكتر فى المنتج . او زى انك تسمح بفترة مرتجع لو العميل جرب المنتج ومعجبوش . او تدى فترة ضمان .. والخ اى حاجة تديله الثقة المهم تكون هتعملها فعلا مش كلام مكتوب وخلاص 

9️⃣ الـــ Call To Action

ودى من اهم اهم الحاجات اللى لازم يحتويها اعلانك . لازم تعرف العميل يعمل ايه بالظبط عشان يوصل لمنتجك ولازم تكون واضحة تماما ليه زى مثلا
للشراء اتصل على
تواصل معنا من خلال رسائل الصفحة
لمزيد من التفصيل اضغط هنا
وهكذا
واذكر عنوانك او موقعك على الخرائط لو كل ده متاح

👈👈👈👈واخيرا : اهم حاجة ان كل اللى تقوله فى محتوى اعلانك يكون صادق جدا وحقيقى وهتعمله فعلا ومنتجك بيقدمه . لان لو كان مجرد كلام لشد انتباه الناس وخلاص وبعد كدا اكتشفوا انه مش حقيقى هتخسر كل حاجة ومنتجك هيقعد عندك

Karem Omran

Digital Marketing Manager | Google Ads Director | SEM | Instructor