ده من الاسئلة اللى بتجيلى كتير جدا .. وهو سؤال مهم وجوهرى .. لان لو اخترت مصدر الترافيك بتاعك غلط ده هيكون من اسباب فشل اى حملة هتعملها
👈ومن اكتر الاخطاء اللى الناس بتعملها انها بتشتغلش على مصدر الترافيك اللى تعرفها بس حتى لو كان مش مناسب خالص لطبيعة المجال او المنتج اللى المفروض هيسوقولها وما بتحولش تتعلم مصادر ترافيك تانية تساعدها و بيختاروا المصدر ده بناء على انهم شاطرين فيه وبس ( فرضا الفيسبوك ) فاى شغل بيجلهم بيروحوا مسوقينه على الفيسبوك لمجرد بس انهم مابيعرفوش يشتغلوا الا عليه هو
👈فنصيحة 👉
لازم تكون بتعرف تشتغل على اكتر من مصدر ترافيك ومافيش حاجة اسمها مصدر ترافيك سيء انما فيه حاجة اسمها مسوق اختار مصدر ترافيك غلط😉
🎯طيب يجى هنا بقى السؤال .. ازاى اختار مصدر الترافيك (Traffic Source) اللى هشتغل عليه ؟
عشان تختار الــ Traffic Sourceصح فى كام عامل كدا بيأثروا فى اختياره
باختصار كدا هتسال نفسك كام سؤال وتجاوب عليهم و بعدها هتبدأ تحدد مصادر الترافيك اللى ينفع تشتغل عليه
👈 ايه بقى العوامل دى او الاسئلة دى ؟
تعالى اقولك🏃♂️🏃
1️⃣ الهدف من الحملة التسويقيه ايه ؟
اختلاف هدف الحملة هيفرق جدا فى اختيار المنصة اللى هتعلن فيها وخصوصا لما يكون الميزانية للحملة محدودة ولازم تعتمد على مصدر ترافيك واحد يعنى لو هدفك Conversion هتختار مثلا حملات الــSearch فى جوجل انما لو هدفك Brand awareness فالفيسبوك هيكون مناسب .. مع مراعاه باقى العوامل التانية
👈ومش معنى كلامى ده انه ما ينفعش تشتغل Brand awareness على جوجل لكن بقول وقتها ان الاقوى هيكون فيها الفيس بوك لطبيعة المنصة نفسها
2️⃣ عدد الترافيك المتواجد على المصدر
من المهم جدا انك تروح تعمل اعلاناتك فى منصة اعلانية يكون عدد الزوار عليها كتير علشان ده هيفرق جدا لانك لو عملت اعلانك فى مكان عدد الزوار فيه قليل بالمنطق كدا هيكون حجم العملاء اللى ممكن تجيلك منه قليل جدا
3️⃣ تواجد جمهورى في مصدر الترافيك
لازم يكون مصدر الترافيك ده جمهورك المستهدف موجود فيه لان اكيد طبعا لو المنصة فيها عدد زوار كتير جدا لكن جمهورى مش من الفئة دى فطبيعى جدا مش هروح اعلن فيها
مثال على كدا 👇
لو انت بتستهدف فئة عمرية كبيرة من 40 الى 60 مثلا فماينفعش تقولى اروح استهدفهم فى TIKTOK عشان عدد الترافيك فيه كبير .. اه هو كبير بس الفئة المستهدفة بتعاتك مش موجودة فيه بالشكل الكافى هما اغلبهم شباب صغير
4️⃣ جوده الترافيك القادم من مصدر الترافيك
من العوامل المهمة جدا فى اختيار مصدر الترافيك هى جودة الترافيك اللى جى منه لان ده بيفرق جدا فى نتائج حملاتك لان فى منصات كتير بتجيب ترافيك و بيكون جودته سيئة للغاية وخصوصا ده بيكون منصات كتير اللى بتشتغل PPV
5️⃣ سياسات مصدر الترافيك والقوعد الخاصة به
كل مصدر ترافيك ليه سياسات خاصة بيه .. مهم جدا انك تعرف السياسات دى كويس اوى .. عشان تعرف اذا كان ممكن تعمل حملتك الاعلانية عليه ولا لاء .. لان ممكن يكون بيمنع الاعلانات على المنتجات اللى زى منتجك وبالتالى لما تيجى تعمل اعلان تلاقيه بيترفض وانت مش عارف بيترفض ليه
6️⃣ اليات العمل فى مصدر الترافيك والامكانيات المتاحة للاستهداف
مهم جدا جدا . لازم تبقى عارف مصدر الترافيك ده امكانياته ايه و تقدر تعمل بيه ايه … و الاهداف التسويقية المتاحة جواه ايه .. و طرق الاستهداف فيه عاملة ازاى .. من الاخر كدا لازم تبقى فاهم المنصة كويس عشان تعرف تلعب بيها كويس اوى فى التسويق و تفن وتبدع براحتك
مثال على كدا 👇
انت عايز تستهدف شارع معين للحملة عندك ده متاح فى الفيسبوك و فى جوجل لكن مش متاح فى TIKTOK حاليا اكيد ده هياثر فى قرارك لما تيجى تختار المنصة اللى هتعلن عليها
👈👈وهرجع اقول تانى كل عامل من دول بيتم التعامل معاه مع مراعاه العوامل التانية 👉👉
7️⃣ النيتش ( المجال او المنتج المعلن عن )
طبعا المجال اللى انت بتشتغل فيه او المنتج اللى بتسوقه بيكون عامل كبير ومهم جدا فى اختيار مصدر الترافيك لان لازم يكون المكان اللى بيظهر فى الاعلان مناسب لنوع المنتج او المجال اللى انت بتسوقله
8️⃣ تكلفة مصدر الترافيك
تكلفة الاعلانات بتختلف من مصدر ترافيك لمصدر ترافيك تانى لكن لو انت بتعرف تشتغل كويس على مصدر الترافيك وعارف تفاصيله فهتقدر تقلل التكلفة فى اى مصدر ترافيك بتحترفه
والمقصود هنا بالتكلفة هى الحد الادنى المسموح بيه بوضعه مثلا زى لينكد ان 10 دولار سناب شات 20 دولار فيسبوك 5 دولار ده على سبيل المثال فقط
9️⃣ ميزانية حملتك الاعلانيه
الميزانية المتاحة للحملة الاعلانية بتفرق فى اختيار مصادر الترافيك لان لو معاك Budget كبيرة هتبقى قادر تشتغل على اكتر من مصدر ترافيك و تقدر تختار اكتر من واحد او اتنين من مصادر الترافيك
انما لو كانت معاك Budget صغيرة فى الحالة دى لازم تركز جدا فى المصدر اللى هتختاره لانك هتعتمد عليه كليا فى الحملات بتاعتك و اختياره بشكل غلط هيخسرك
🛑دى تقريبا العوامل اللى بناء عليها بتختار مصادر الترافيك بتاعتك .. لو عندك اى اضافة او عوامل تانية بتاثر فى اختيارك لمصدر الترافيك ياريت تشاركنا برايك وتقولهالنا
👈 الخلاصة 👉
لازم تختار مصدر الترافيك اللى هتشتغل عليه بعناية جدا لان اختيارك ليه بشكل صح هو سبب من اسباب نجاح حملاتك التسويقية وخد فى اعتبارك كل العوامل السابقة
وكمان لازم تتعلم اكتر من مصدر ترافك وتحترفه عشان تقدر تدير العملية اعلانية بشكل احترافى
