👈 التسويق لعبة مش كل الناس حريفه فيها 👉
يعنى ايه الجملة دى
تعالى اقولك ببساطة ومن وجهة نظرى يعنى ايه التسويق لعبة وازاى تكون حريف فيها و الــ Mentality بتاعتى انا فيها 😉
عشان تكون مسوق شاطر ولاعيب محترف فيه لازم تفهم تسويق كويس والمقصود بالتسويق هنا مش اعلانين على الفيسبوك ولا جوجل ولا اى منصة .. لاء خالص
المقصود بالتسويق هنا هو كل تفاصيل التسويق من ال (أ) الى (ي)
التسويق عبارة عن علم وفن وابداع . ولو تعاملت مع التسويق بالمعانى دى اضافة الى انه Game انت نازله مع المنافسين صدقنى هتحقق منه نجاحات فوق ما تتخيل
وده كله بيرجع لطريقة تفكيرك والــ Mentality بتاعتك . وانا هقولك انا بتعامل مع التسويق ازاى و الــ Mentality بتاعتى . والكلام ده انا بقوله لطلابى فى ورش العمل اللى بعملها لان طريقة روئيتك للاشياء هى اللى بتخلق عندك الابداع والحافز
احنا قولنا ان التسويق علم وفن وابداع + Game صح . تعالى بقى افهمك
🛑 اولا : التسويق عــــــــلم
لازم تبقى متاكد تماما ان التسويق ده علم وليه اصول واساسيات واعمدة ما ينفعش تشتغل فيه الا وانت عارف الاساسيات دى وفاهمها كويس عشان تقدر تنجح فيه ومن اهم الاساسيات دى
✅ مفهوم التسويق
✅ المزيج التسويقى
✅ التحليل ( دراسة الشركة او المنتج والسوق)
✅ الاهداف التسويقية
✅ الاستراتيجيات التسويقية
✅ الخطط التشغيليه
✅ تحديد الميزانيات التسويقية
✅ مؤشرات القياس التسويقية
✅ وعلاقة التسويق بالمبيعات
ودى ابسط الاساسيات اللى لازم تبقى فاهمها عن التسويق كعلم عشان تقدر تنجح فيه من الناحية العلمية وفى كام بوست ممكن يفيدوك لو مكنتش قرتهم قبل كدا 👇👇
🛑 ثانيا : التسويق ابـــــــداع
وتعالى هنا واقف شويا .. لاء اقف كتيرررررر .. ليه .. لان مش كل مسوق بيكون مبدع زى اى فنان اى فنان مبدع وفنان عادى نفس القصة فى التسويق فى مسوق عادى ومسوق مبدع
طب ايه الابداع بقى فى التسويق ؟ .. اقولك
الابداع فى التسويق هو قدرتك على قراءة وتحليل المشكله التسويقيه للمنتج اوالشركة بشكل غير تقليدى وايجاد فكرة غير تقليدية وتكون بسيطة بتوصل الرسالة التسويقية للعميل بابداع يخلى العميل منجذب لاعلانك او منتجك
وابسط مثال على كدا اعلان محمد صلاح السنة اللى فاتت مع DHL لما قفل حسابات السوشيال بتاعته وكتب قبلها جملة ( ده وقت التواصل الحقيقى – Time to get in touch, for real )
فالابداع هنا بيكون فى طريقة تفكيرك وافكارك اللى بتطرحها للحملة التسويقية
🛑 ثالثا : التسويق فــــــــــن
هنا نيجى بقى لجزء مهم جدا جدا . الا وهو طريقة تنفيذك للحملة التسويقية وتطبيقك للعلم الخاص بالتسويق مع تحديد خطوات تنفيذ فكرتك الابداعية .. فى حاجتين 👇
👈 يا هتنفذ الحملة التسويقية بخطوات فيها فن وقدرة على توصيل الفكرة الابداعية بتاعتك بشكل صح جدا وهو ده الفن بقى
👈 يا هتنفذ الحملة التسويقية بتاعتك بخطوات فيها غشمية تضيع كل الابداع فى الفكرة وتبوظ الدنيا اكتر
عشان كدا لازم تكون فنان فى تنفيذ علم التسويق وابداع التسويق لان الاتنين عشان ينجحوا هيعتمدوا جدا على ثالثا الا وهو فن التسويق
وطبعا مثال على التنفيذ بفن هيكون نفس المثال السابق حملة محمد صلاح مع DHL وكانت الخطوات اللى نفذوها كالتالى
✅الحملة بدأت بتويتة من محمد صلاح قال فيها
Time to get in touch, for real – ده وقت التواصل الحقيقى
✅ بعدها مباشرة محمد صلاح اختفى تماما من السوشيال ميديا و قفل حساباته
✅ كل العالم اتكلم محمد صلاح راح فين و ليه قفل حساباته وكل الناس حاولت توصله باى شكل او لاى معلومة من اى حد يعرف يقول سبب ده ايه
✅ بعدها بيومين تظهر DHL وتقول احنا نقدر نوصلك لمحمد صلاح
✅ وبعدها باربع ايام يفتح محمد صلاح حسابات السوشيا ميديا و يظهر بصورة مع طرد جايله من DHL
✅ وطبعا هنا بدأت الناس تفهم وتربط ان الموضوع حملة اعلانية لــ DHL مع محمد صلاح
✅ بعد كام ساعة نزل اعلان DHL المصور فيديو لو ركزت فى كل تفاصيل الفيديو هتلاقى فى كل لقطة فى ابداع من النواحى الانسانية بالذات واد ايه التواصل الملموس والحقيقى ليه تاثير نفسى وايجابى جدا على اللى حواليك
✅ وطبعا ال slogan بتاع الحملة ( شبكة التواصل الانسانى ) قمة فى العبقرية و تاكيد للفكرة الاساسية اللى مبنى عليها الاعلان وهى التواصل الحقيقى والملوس بين البشر اهم كتير من التواصل من خلال السوشيال ميديا حتى لو ما بنكم مسافات كبيرة
وطبعا فى امثلة كتير لافكار ابداعية كأفكار ولما جت تتنفذ اتنفذت بشكل سيىء جدا
🛑 رابعا : التسويق Game
انا دايما بقول لطلابى فى ورش العمل ان التسويق Game وخصوصا زى لعبة كورة القدم .. لانك بعد ما عملت كل اللى فوق ده من علم و فن وابداع . انت نزلت وحملتك وخطتك التسويقية بانت للمنافسين فهتلاقى منافسين كتير بترد عليك وبردو بطرق ابداعية وغيرها فلو مكنتش حريف لعبة التسويق و بتعرف تلعب وتغير فى خطتك بسرعة وعامل حسابك على كل الاحتمالات اللى ممكن تواجهها من المنافسين والسوق بعد ماتنزل بحملتك ممكن بسهوله هما ياخدو منك كل المجهود ده لصالحهم هما وانت واقف تتفرج عليهم.
زى ماقولت لعبة كرة القدم لو انت مدرب على الخط افكارك اتقرت وانت مش محضر اى تعديل وتطوير فى خطط لعبك وعارف تنزل امتى بلعيب معين يغير خطتك هيبقى المدرب التانى بياكل عيش عليك وهيقلب الماتش لصالحه
👈الخلاصة 👇👇
لازم تكون مسوق عنده على الاقل اساسيات علم التسويق ومبدع فى افكاره وتحليله وفنان فى تنفيذ خططه و لاعيب جامد فى تعديل خططه التسويقية
لو عملت كدا صدقنى اغلب حملاتك هتنجح وتكسر الدنيا . وهيكون بيدفع فيك ارقام عشان تمسك حملات شركات