ازاى تنجح فى الشغل الاونلاين؟ وازاى تتعلمه صح؟

ازاى تنجح فى الشغل الاونلاين؟ وازاى تتعلمه صح؟

ازاى انجح فى الشغل اون لاين واتعلمه صح ؟ 🤔🤔

ده من الاسئلة الكتير اللى بتجيلى و اللى حبيت اجاوب عليه فى بشكل مفصل عشان كل الناس اللى بيدور فى ذهنها الموضوع ده تلاقى اجابه واضحة ليه .. والكلام ده انا بقوله من خبره اكتر من 8 سنين فى مجال التسويق الالكترونى

نيجى للمهم ازاى بقى انجح واتعلم صح ؟ 👇👇

1️⃣ – اول حاجة شوف شغفك فى اى جزء من اجزاء الشغل الاون لاين . يعنى مثلا بتحب التصميم او البرمجة او التسويق او الكتابه … الخ .. يعنى شوف انت شاطر فى ايه وركز انك تشتغل فيه اون لاين عشان تبقى بتشتغل وانت حابب اللى بتعمله

2️⃣ – ما تلاقيش نفسك بقى بتعرف تعمل صورتين على الفوتوشوب او بتعرف تقول كلمتين تسويق تروح رايح قايل انا مسوق اون لاين او انا مصمم فوتوشوب كدا انت بتقضى على نفسك قبل ما تبتدى
ليه … لان ببساطة سوق العمل هتلاقى مختلف جدا عن اللى بيدور فى دماغك وهتلاقى العملاء بيطلبوا حاجات انت ماتعرفش دى ايه اصلا و شكلك هيبقى زباله قصادهم .. وطبيعى السمعه هتسمع فى السوق .. تيجى تقولى طب اعمل ايه .. هقولك فى النقطة رقم 3 اللى جيا دى

3️⃣ – دى بقى فيها الخلاصة واقراها كويس اوى عشان هتفرق معاك هى طويله حبتين بس صدقنى هتفرق معاك فى عمرك كله وفى فلوسك … بص يا سيدى
تشوف التخصص اللى انت عايز تتخصص فى الجزء اللى فيه شغفك يعنى مثلا لو هنقول التسويق طبعا ده لوحده عالم كبير ومش بالساهل تقول انا مسوق اون لاين شاطر فلازم تبدأ تحدد تخصص معين فى التسويق زى مثلا هتشتغل اعلانات الفيسبوك او اعلانات جوجل
وتبدأ تتعلم الجزء ده من الـــ (أ) الى الـــ (ي) وتفهمه كويس

تيجى تسألنى سؤال وجيه جدا .. اتعلمه ازاى صح ؟🤔
انا هقولك شويا نصائح وانت اختار الطريقة اللى تتعلمه بيها

👈 الطريقة الاولى التعليم الذاتى

يعنى ايه …. يعنى انت تدور على فيديوهات باليوتيوب بتشرح الموضوع وتقرا مقالات كتير فيه وهكذا وتبداء تبطق وتجرب لحد ما تتعلم صح ( وماتجربش فى عملاء .. جرب فى نفسك .. لان شغل الناس وفلوسهم مش لعبه)

👈 تاخد كورسات او ورش عمل

وهنا انا هنصحك بكام نصيحه مهمين حطهم حلقة فى ودنك لما تيجى تاخد كورس مع اى حد اى كان اسمه وشهرته
🔴 متعتمدش خالص على اسم او شهرة المكان او الشخص اللى هيديك الكورس او ورشة العمل
🔴 اختار شخص او مكان يكون فعلا شغال لعملاء بجد فى المجال اللى بيدرسه مش مجرد انه مكان او شخص بيدرس
🔴 لازم ثم لازم ثم لازم .. شوفت كام لازم عشان بس تتاكد انها مهمه اوى … لازم ايه بقى ؟؟
لازم تشوف وتعرف تفاصيل الكورس او ورشة العمل و تعرف الجدول التدريبى والمحتوى اللى هيتقدملك تفصيلا ولو نقطة مش واضحة اتصل بالمكان او الشخص واسال فيها ولو فى نقط معينة انت عايز تعرفها من خلال الكورس ده او ورشة العمل دى اسال هل هتكون موجودة المعلومات دى فى الكورس او الورشة اللى هتحضرها ولا لاء

👈 طب ليه الكلام ده 👉

عشان ناس كتير من اللى بتروح تاخد كورس او ورشة عمل بتقرى الخط العريض للكورس وتفتكر انه بيحتوى على المعلومات اللى هما عايزنها وتتفاجأ بعد كدا انها مش فيه
والسبب التانى ان كمان الناس اللى بتدى الكورسات بتستخدم مصطلحات كبيرة عشان تجذب الناس و لما بتيجى تدى الكورس تلاقى الموضوع اساسيات

وهتيجى تقولى مين الغلطان فيهم هقولك اللى رايح يدفع فلوس فى حاجة من غير ما يتاكد منها بالظبط وبالتفصيل

وعشان كدا قولتلك ما تعتمدش على اسم معروف او لاء وقولتلك تتاكد وتتصل وتفهم وتسال بالتفصيل الممل ده حقك ماتفرتش فيه

طبعا ورش العمل والكورسات بتوفر عليك وقت كبير جدا وبتنقلك خبرة ممكن تاخد وقت كبير عقبال ما توصلها

👈 التطبيق العملى

تبدأ تطبق عملى بقى اى حاجة اتعلمتها سواء تعليم ذاتى او كورسات و يفضل انك تطبقها عملى وانت فى الكورس عشان لو ظهرت قدامك حاجة مش عارفها ووقفتك تسال فيها وانت لسا فى الكورس

4️⃣ خلاص انت كدا اتخصصت فى جزء معين واتعلمته ومارسته واشتغلت بيه وبقى يدخلك دخل كويس وبقيت تنين فيه .. ابدأ شوف جزء تانى متعلق بنفس شغفك وبيكمل الجزء الاول واعمل فيه نفس اللى عملته فى الجزء الاول
( يعنى مثلان الجزء الاول كانت علانات فيسبوك يبقى الجزء التانى اعلانات جوجل وهكذا)

هتلاق نفسك بعد فترة استاذ ورئيس قسم فى تخصص الحملات الاعلانية المدفوعة على اكبر المنصات الاعلانية فى الاون لاين وفاهم انت بتعمل ايه كويس

انما تروح تاخدلى كورس يقولك هشرحلك التسويق الالكترونى و الفيسبوك و لينكدان وسناب شات وانستجرام وجوجل ادز وتصميم فوتوشوب ومش عارف ايه ده ناقص يقولك تعالى هعلمك الطبيخ . وكل ده فى اسبوعين مثلا

اعرف على طول ان الموضوع ده لو فرضنا حسن نيه الشخص اللى بيقدمه فعلا هيبقى كلها اساسيات وقشور عن كل حاجة من دى لان كل تخصص من دول محتاج وقت لوحده كافى يتشرح فيه عشان تبقى فاهمه كويس وتعرف تشتغل بيه

Karem Omran

Digital Marketing Manager | Google Ads Director | SEM | Instructor

اترك تعليقاً