المزيج التسويقى .. هو الانشطة اللى بيتم ادارتها فى عملية التسويق والمزيج التسويقى بيتكون فى الاساس من 4P’s واتطور بعدها على مراحل لحد ما بقى 9P’s وهى
· المنتج product
· السعر price
· المكان place
· الترويج promotion
· الناس people
· العملية process
· الادلة المادية Physical Evidence
· التغليف packging
· الدفع payment
و انا ضفت عليهم كمان فى رائى الشخصى CS (خدمة العملاء الشخصية Personal customer service) عشان يبقوا 10P’s
وهنتكلم عن كل عنصر فيهم ببساطة لتوضيحه
1 – المنتج product 👔🧥
المقصود بيه المنتج الملموس زى الموبايل مثلا او غير ملموس زى مثلا الكشف الطبى او فكرة مطلوب تسوقيها ويكون بيقدم منفعة للعميل مقابل منفعة لصاحب المنتج ( الدفع نقدا مثلا)
وهنا ممكن يكون فى حالتين قصاد المسوق وهما :
– اولا : ان يكون لسا الشركة ( صاحب المنتج ) مانتجوش فعلا
وفى الحالة دى لازم يكون المسوق له راى فى كل تفصيلة خاصة بالمنتج بعد دراسة السوق والمنافسين زى مثلا
( المشاركة فى تحديد جودة المنتج – شكل المنتج وحجمه – الطريقة اللى هيتقدم بيها المنتج للعملاء – الاسم التجارى للمنتج وشعاره – وغيرها من الجوانب الخاصة بالمنتج )
– ثانيا : ان يكون المنتج موجود فعلا بالسوق و يحتاج الى تنشيط العملية التسويقية او تغيرها
وفى الحالة دى بيتم دارسة كل شىء عن المنتج و واللى تم قبل كدا لتسويق المنتج و تحليل اسباب ضعف العملية التسويقية والاحتياج لتغيرها ومن النتائج يتم اعداد خطة تسويقية لتنفيذ الخطة التسويقية الجديدة
2 – السعر price 💸
هو المبلغ اللى بيدفعه العميل عشان ياخد المنتج او الخدمة و السعر ده بيتحدد من خلال عوامل كتير اهمها المنتجات المنافسة فى السوق – الجودة – تكاليف انتاج المنتج – العلامة التجارية
3 – المكان place 🏙️
المكان بيشمل حاجات كتير زى مثلا مكان بيع المنتج – مكان توزيعه – المخازن – اماكن الشحن وتوصيل المنتج للعملاء
والمكان من الحاجات المهمة جدا فى عملية التسويق لان لازم المنتج يوصل للعميل فى المكان والوقت المناسبين ليه و بطريقة سهلة من غير تعقيدات
4 – الترويج promotion 🔖🏷️
باختصار هو كل الطرق اللى تقدر توصل بيها للعميل بشكل فعال وتقنعه بالمنتج
والترويج بيشمل ( الاعلان – العروض على المنتجات – البيع المباشر ( الشخصى ) – العلاقات العامة مع الاخرين )
5 – الناس people 👨👩
هما من العوامل القوية فى نجاح اى عملية تسويقية ومقصود بيهم الاشخاص العاملين فى الشركة او على المنتج و لازم يكونا مدربين بشكل كويس على المنتج و على تقديم كل الخدمات التعلقة بيه و بشكل فيه راحة و اولفة مع العميل
6 – العملية process 🤖
هى عملية متابعة كل الاجراءات من بداية انتاج المنتج لحد ما يوصل للعميل و مراقبتها و معرفة جودة تنفيذه و تنظيمها وانها بتلبى احتياج العميل
7 – الادلة المادية Physical Evidence 🏛️
هى العناصر اللى بتخلى العملاء يبنى حكم او تصور عن الشركة والمنتج ويكون انطباع عام عنهم زى المبانى الخاصة بالشركة – اليفط الاعلانية – الكتيبات – الكروت و الفلاير وغيرها من الادلة المادية
8 – التغليف packging 🎁
فى ناس اعتبرت التغليف packging جزء من المنتج وناس تانية شافت انه من عناصر الترويج لانه بيكون سبب قوى لجذاب العميل للمنتج وفى بعض المنتجات بتكون تكلفة تغليفها تقترب من تكلفة المنتج نفسه .. واهمية التغليف بترجع لانه بيحمى المنتج من العوامل الخارجية و كمان بيكون عليه كل تفاصيل المنتج و بيساعد جدا فى تكوين انطباع قوى عن الشركة والمنتج
9 – الدفع payment 💵
وده العنصر التاسع اللى ادخله ( برايان كاي لو – K. Law Bryan) فى عام 2008 والمقصود بيه تنوع طرق الدفع و نخليها اسهل للعميل وامنة و وجود طرق للمكافأة العملاء زى المنتشر من نقاط على الشراء و تاخد خصم بالنقاط دى وغيرها من طرق الدفع اللى بتشجع العميل انه يشترى منتج الشركة او يستعمل خدمتها بشكل اكبرى ( زى عندنا ها فى مصر نقط الكريدت كارد اللى بتقدمها البنوك مع كل استخدام للفيزا )
الدفع payment بقى من العناصر المهم جدا وخصوصا فى الفترة الاخيرة مع انتشار البيع الاون لاين و التجارة الالكترونية وكل ماكانت سهلة على العميل كل ما شجعت العميل انه يشترى المنتج
10 – خدمة العملاء الشخصية Personal customer service 🕵️♀️💪
وده العنصر العاشر واعتقد انه مش موجود فى اى مرجع او اى دراسة وده انا بضيفه بشكل شخصى للمزيج التسويقى نتاج خبرتى فى مجال التسويق ولاهميته فى الفترة الاخيرة جدا
واهميته فى وجهة نظرى بترجع ان بعد ما توصل المنتج للعميل و قابلت مشاكل او اى استفسار خاصة بيه لو مقدرتش تحلها من خلال فريق خدمة عملاء قوى ومدرب بشكل كويس هتخسر اقوى وسيلة فى التسويق وهى (Word of Mouth) وهتبقى سلاح قوى ضدك وهتخسر كل العملاء اللى ممكن يجولك من العميل ده و طبعا العميل نفسه و مش هتقدر تكسب ثقته تانى مهما عملت حملات اعلانية الا لو رجعت وقدمت للعميل ده خدمة عملاء ممتازة و ترضيه و تعويض عن المشاكل السابقة
👌 الخلاصة 👌
المزيج التسويقى مجموعة من العناصر اللى بتكمل بعضها و لازم يتم دراستها و تحليلها بشكل تفصيل ونحط كل عنصر اهميته وما نستغاش عن اى عنصر فيهم عشان نقدر نحقق عملية تسويقية قوية تحقق نجاح قوى من خلال خطة تسويقية متكاملة