سر نجاحك مع Google Ads هو ( الكلمات المفتاحية ) او الكلمات الرئيسية . زى ما تحب تسميها انت بقى
طب انت محتاج تعرف ايه عنها ببساطة عشان تقدر تنجح بيها ؟🤔
اقولك .. ركز معايا
الكلمات المفتاحية ليها 3 اشكال و 5 انواع
مهم جدا تعرف الفروق بنهم وازاى تقدر تستفيد بيهم كلهم
تعالى معايا بقى كدا وشوف 👇👇
اولا : اشكال الكلمات المفتاحية
👈 اول شكل معانا هو كلمات مفتاحية فردية – single Keywords
ودى بقى بتكون كلمة واحدة بس ( مثلا : تسويق ) بس خد بالك من حاجتين
✅ حلو اوى انك تمسك كلمة فردية فى ال SEO وتكون بتظهرك فى الصفحة الاولى و لعلمك ده فى الوقت حالى بيبقى صعب لكن مش مستحيل وتقدر تعملها بس اجتهد
❎ووحش جدا انك تفكر لما تيجى تعمل حملة اعلانية على google Ads انك تختار كلمة فردية وتشتغل عليها لانك كدا بمنتهى البساطة بترمى فلوسك فى الارض
يعنى لو فرضنا انك عملت حملة اعلانية لشركة تسويق الكترونى و اخترت فى حملتك انك تظهر بكلمة ( تسويق ) بس … تخيل بقى يا مؤمن ان اى حد يكتب كلمة تسويق انت ممكن تظهرله حتى لو مش عايز خدمات تسويق الكترونى يعنى مثلا كتب ( تسويق لاعبين بالخارج ) وغيرها
ماتستخدمهاش الا لو بتعمل Brand ومايكونش فى السيرش يكون فى حملات GDN
👈 تانى شكل معانا كلمات مفتاحية قصيرة – Short Tail Keywords
ودى بقى بتكون كلمتين ( مثلا : تسويق الكترونى ) ودى كل ما كنت بتختارها بشكل كويس و تكتبهم بشكل صح زى ما هقولك فى انواع الكلمات تحت فى البوست هتجبلك نتايجة كويسة
👈 تالت شكل معانا كلمات مفتاحية طويلة – Long Tail Keyword
ودى بقى بتكون بتكون اكتر من كلمتين ( مثلا : شركة تسويق الكترونى – افضل شركة تسويق الكترونى ) وطبعا دى بتكون اكثر دقة وافضل فى السيرش وافضل فى النتائج وبردو لازم تراعى كتابتها بالشكل الصح زى ما هقولك فى انواع الكلمات تحت فى البوست
طب اللى فاتت دى الاشكال .. امال الانواع دى ايه بقى ؟🤔
سؤال كويس . ركز فيها دى بقى لان ده اللى هيجبلك نتائج زى الفل لو استخدمتهم صح
مركز معايا ولا نمت 🧐 . قشطة . يلا بينا . بص يا سيدى 👇👇
ثانيا : انواع الكلمات المفتاحية
عندنا 5 انواع من الكلمات المفتاحية وطريقة كتابة ليهم اللى هما 👇
👈 كلمات واسعة ( غير محددة ) – Broad
– هى كلمة يتم وضعها بشكلها الطبيعى ومن الممكن ان تكون كلمة واحدة او اكثر
– يتم كتابتها كدا من غير اى اضافات : شركة تسويق الكترونى
– فى حالة البحث تسمح بالاخطاء الاملائية والكلمات المترادفة
يعنى ايه الكلام ده ( يعنى لو كتبت الالف (ا) زى ما تكتبها كدا (أ) مش هتفرق وممكن ياخد معنى الكلمة ويظهرك فى النتائج)
👈 كلمات واسعة ( محددة ) – Modified Broad
– هى كلمات يتم التركيز على وجوبية وجود كلمة او اكثر فى البحث
– يتم كتابتها هكذا : +شركة+ تسويق الكترونى
– يستلزم فى حالة البحث وجود الكلمات المسبوقة (+) مع عدم الترتيب
يعنى ايه الكلام ده كمان ( يعنى بتضيف علامة + قبل الكلمة اللى انت عايزها تكون مكتوبة فى السيرش لازم الكلمة دى تكون مكتوبة عشان تظهر فى النتايج ومش شرط انها تبقى مترتبة)
👈 كلمات مطابقة العبارة – Phrase
– كلمات الاكثر شيوعا فى الاستخدام و يجب فيها مراعاة ترتيب الكلمات
– يتم كتابتها هكذا : “ شركة تسويق الكترونى”
– فى حالة البحث تسمح بالاخطاء الاملائية و امكانية اضافة كلمات اخرى بعد الكلمة او قبلها
يعنى ايه الكلام ده كمان ( يعنى بتضيف الكلمة ما بين ” “ ودى لازم الكلمات تبقى مكتوبة فى السيرش بنفس الترتيب عشان انت تظهر فى النتائج ودى كمان بتسمح بالاخطاء الاملائية زى ما قولنا فى اول نوع من الكلمات وكان ممكن اللى بيعمل سيرش يضيف قبلها كلمة او بعدها كلمة المهم تكون الكلمة المفتاحية دى مكتوبه بنفس الترتيب )
👈 كلمات مطابقة تامة – Exact
– هى كلمات تحقق نتائج قوية لانها تعتمد على نفس ما يبحث عنه العميل بشكل كامل
– يتم كتابتها هكذا : [شركة تسويق الكترونى]
– فى حالة البحث يجب ان تتطابق الكلمة التى يتم البحث بها مع هذه الكلمة تماما
يعنى ايه الكلام ده كمان ( يعنى بتضيف الكلمة ما بين [ ] ودى لازم الكلمات تبقى مكتوبة فى السيرش بنفس الكلمة بالظبط عشان انت تظهر فى نتائج البحث ومايجيش قبلها ولا بعدها اى كلمات )
👈 كلمات سلبية – Negative
– هى كلمات يتم تجنبها فى حالة البحث بها و عدم ظهور الاعلان فى حالة وجودها فى البحث
– يتم كتابتها هكذا : –شركة تسويق الكترونى
– فى حالة وجود السالب قبل ” او [ ] يكسر القاعدة الخاصة بنوع الكلمة
يعنى ايه الكلام ده كمان (يعنى بتضيف علامة – قبل الكلمة اللى انت عايز مايظهرش اعلانك بيها لو اتكتبت فى السيرش وطبعا لو حطيت علامة – قبل اى قاعدة من القواعد بتاعت الكلمات اللى فاتت يبقى انت بتعكس القاعدة بتاعتها )